Santakarako dorre garrantzitsua Aragoiren ibarreko toki gehienetatik ikusten da. XVI. mendean eraitsitako gaztelu nabarmen baten aztarna bakarra da. Izan ere, ohikoa zenaz bestela, dorrea ez zuten behetik eraitsi, baizik eta ardatz bertikaletik moztu baitzuten; beraz, gaur egun ikusten den bezalaxe gelditu zen. Herriaren beste muturrean, Aragoi ibaitik hurbil, Cara Erromatar Hiriaren hondakinak daude (K.o. I.-IV. mendeak), Interes Kulturaleko Ondasun izendatuak; aztarnak kanpoaldetik bisitatzeko aukera dago.
Proposatutako ibilbidea bi kiribil argitan dago banatua: lehena Santakarako Gaztelurako igoera da, bertako Dorre Nagusia ikusteko; bigarrena, aldiz, luzeagoa da, mendebalderantz egiten du eta itzuleran Aragoi ibaiko ibar-basoak zeharkatzen ditu; bukaeran, gainera, erromatar aztarnategiaren ondotik igarotzen da. Kiribil bakoitza bereizita egin daiteke edo bata bestearen atzetik.
Malda txikieneko bidean gora igoko gara gaztelura, muinoa iparraldetik inguratuta. Gero, zuzenean eskaileretan behera jaitsiko gara. Bigarren kiribilaren hasiera lehenagoko abere-bide bat da, Ramal de la Barca izenekoa. Gero, Traibuenasera doan NA-1240 errepidea gurutzatu eta Aragoi ibaia nahiz ibaiertzeko basoak inguratzen dituzten baratze eta alorren artetik itzuliko gara.
