Santo Domingo baseliza muino baten gailurrean dago, Pitillasko Aintziratik hurbil eta lehenago Sebasan esaten zitzaion eremu zabal baten barnean. Aipatu muinoan, hainbat garaitako aztarna arkeologikoak agertu dira, hots, Neolitotik erromatarren garaira bitartekoak, leku horrek inguru osoan mendez mende izaniko garrantziaren erakusgarri. Egungo baseliza XVII. mendekoa da eta, Pitillastik, erromerian joaten dira maiatzeko lehen larunbatean, San Gregorio Ostiakoaren egunean.
Ibilbide honetan, Santo Domingo baseliza eta Pitillasko Aintziraren iparraldea bisitatuko ditugu, hau da, jendeak gutxien ezagutzen duen aldea. Baseliza muinoaren gainean dago eta, handik, ikuspegi zoragarriak gozatuko ditugu inguruz inguru eta aintzirarantz. Ibilbideak ez du zailtasun teknikorik eta jende guztiarendako da egokia.
Ibilbidea Pitillastik ateratzen da Uxueko bidea harturik eta ekialderantz jarraitzen du aurrera 3 bat km-an alorren arteko pista errazetan barna. Baselizara igo eta gero, ibilbideak hegoalderantz jarraitzen du aintziraren inguruetara iritsi arte. Han, mendebalderantz biratu eta zuzenean itzultzen da Pitillaserantz Mostrakasko bidean barna.
