Erraketa itxurako ibilbidea da erkameztien eta pinudien artean, Ugurutz izeneko errekak osaturiko ibarrean barna. Bide osoan, hainbat ziza mota ikusi eta biltzeko aukera izanen dugu, gure gozamenerako, betiere bilketa jasangarrirako arauak betez. Ibilbide atsegin hau egin ondoren, arras gomendagarria da Iratxeta bisitatzea, herri eder-ederra baita. Bertan, gainera, garai deritzon eraikuntza berezia miretsiko dugu; harriz egina, harlauzazko teilatua du eta erdi-puntuko arkuak ere bai. Nafarroako garairik hegoaldekoena da.
Hasieran, 2 km-ko nekazaritza-bide bat hartuko dugu lehorreko alorren eta pinuz nahiz erkametzez beteriko mazelen artean. Erreka bat gurutzatu ondoren eta, Liberalaren ukuilura iritsi aurretik, pista nagusitik atera eta Monte de Abajoko igoerari helduko diogu; bidexka polita da erkameztian barrena eta errekaren goialderaino eramanen gaitu. Gero, Ugurutzeko mendi-hegaletatik jaitsiko gara. Jaitsiera laburra baina oso pikoa da. Bestela, joaneko bide beretik itzultzeko parada dugu. Behin behean, baso-bide erraz batera iritsi eta Iratxetara eramanen gaitu atzera.
