Uxueko hego-ekialdean, jenderik gabeko eremu handi-handia dago, artadiz eta pinudiz betea, eta tarteka soroz zipriztindua, Murillo el Frutora bitarte. Mendi azalera handi hori Aragoi ibaira isurtzen diren hainbat errekak zeharkatua dago. Horien artean, Dorrondiagako erreka da nabarmentzekoa. Dorrondiaga eta Ollatuko mendi-hegal maldatsuek ixten dute erreka hegoaldetik eta ibilbide honetakoa bezalako bideek gurutzatzen dituzte.
Ibilbidea XIII. mendeko San Migel baseliza erromanikoaren ondotik abiatzen da eta hego-ekialderantz doa Muelasko Bidean barna. 1,7 km-ko jaitsieraren ondotik, Santa Kruz izeneko idoira iritsiko gara; bertan, ezkerreko bidea hartu beharko dugu toki lauetan jarraitzeko eta Ollatuko basoak gainetik inguratzeko.
Mendi txiki bat igo ondoren eta Behien Ukuiluaren hondakinen ondotik igaro eta gero, bidexkak behera eramanen gaitu, harik eta iparraldetik heldu den pista topatu arte. Toki horretan, 180º-ko biraketa egin eta Uxuera itzuliko gara iparralderantz, Dorrondiaga eta Ollatuko mendi-hegal oihantsuetan ibiliz. Azken bi kilometroetan igoera latza dago errekatik Uxueraino igotzeko, herria gure ibilbidearen amaiera baita.
