Turbileko Kastroa arkeologia-aztarnategi garrantzitsua da eta goragune batean kokaturik dago, Beireko higunetik hiru bat kilometrora ipar-ekialdera. Brontze Aroaren bukaerakoa da jatorriz eta Burdin Aroaren akaberan jo zuen goia (K.a. IV.-II. m.). 2010ean, estela-estatua bat aurkitu zen, izugarri handia bere garairako. Gerlari baten irudikapena da. Nafarroako eskultura exenturik zaharrena da orain arte aurkitutakoen artean, 2.200 urtetik gorako antzinatasuna baitu.
Ibilbide honek Beiretik Turbileko Kastroraino eramanen gaitu nekazaritza-bide zabaletan barna eta, behin hara iritsita, bidexka mehar batek muinoa zeharkatzen du. Beireko hirigunea gurutzatu eta hilerriaren ondotik igaro ondoren, lehen interesgunea La Laguna esaten zaion natur inguru ederra da, leku xarmaduna, lezkaz inguratua, toki aproposa atsedenaldi txiki bat egiteko.
Ibilbideak muinoan gora jarraitzen du goraino iritsi arte. Hantxe, kastro zaharraren aztarnak daude. Beste muinoan, berriz, gerlariaren estela-estatuaren erreplika bat dago zut. Bisitaldiaren ondotik, bidexka piko batetik jaitsi, nekazaritza-bide zabal bat topatu eta Beirera itzuliko gara.
