Ibilaldiak Buskil izeneko tontor apaleraino eramanen gaitu, karraskadi eta erkameztien artean, zereal-alorrak tartekaturik. Artaxoako eta Puiuko mugatik hurbil dago. Hasiera Caserío del Monte deritzon tokia da. Leku horretaraino iristeko, Artaxoara joateko errepidea hartuko dugu Tafallatik abiaturik (NA-6030). Hiritik 5 km-ra, eraikuntza bat eta bi idoi aurkituko ditugu gure eskuinean (Monte eta Perejil izenekoak), bai eta zelaigune handi bat ere: Caserío del Monte.
Nola halako desnibela duen ibilbide laburra da eta udal barrutiko tokirik garaienetako batera eramanen gaitu (635 m). Handik, eskualde osoa ikusiko dugu eta, oskarbi dagoelarik, Moncayo eta Pirinioak ere bai. Tokiari “Buskil” esaten zaio, hau da, azienda ixteko barruti bat da, sastrakaz inguratua. Oraindik ere horrelako barrutiren bat ikusiko dugu.
Ibilbidea, lehenik, ibar txiki eder batera igotzen da, pista lau eta atsegin batetik. Laster, eskuineko bide zabal bat hartuko dugu agerian dagoen muinoko hegalean gora igotzeko. Pista bukaturik, basoan sartzen den bidexka txiki batetik jarraituko dugu; eite handiko zuhaitzak daude. Xenda horrek tontorreraino eramanen gaitu. Han erpin geodesiko bat dago. Jendeak «Harri Zuria» esaten dio. Beste isurialde batetik jaitsiko gara, hasierako errekara iritsi arte.
