Fuente de los Ángeles iturrira joateko ibilbidea Erdialdeko ibilaldirik xarmadunenetako bat da. Bazter zoragarriak zeharkatzen ditu, bai eta artez, haritzez eta astigar zenbaitez osaturiko baso harrigarria ere. Urtetan, ibilbide seinaleztatua San Martiun Unx eta Uxue arteko errepidearen 1,7 km-tik abiatu da. Oraingoan, seinaleak berritu eta abialekua hiriguneraino eraman da; ondorioz, egungo ibilbidea hasierakoa baino lau kilometro luzeagoa da.
Ibilbidea Andre Mariaren eliza gotikoaren ondoan hasten da eta NA-132 errepideak herri barnean egiten duen bideari jarraikiz zeharkatzen du San Martin Unx, Lerga aldera. Lehen bihurgunean, eskuinera egiten du Huertos kalea jaisteko eta, handik, herritik ateratzeko. Alorren eta aisiarako finken artean jarraitzen du aurrera, harik eta Uxuera doan errepidea jo arte. Huraxe gurutzaturik, ibilbideak gora segitzen du eta, aurrerago, kiribil handi bat egiten du Fuente de los Ángeles iturriraino; toki aproposa da jarlekuetan atseden hartzeko eta urarekin freskatzeko.
Iturri aldetik, ibilbideak aurrera egiten du kilometro batez bidexka polit batetik. Gero, ordea, kiribilaren hasierara itzultzen da, landaretzak nahiko itxi duen pista bat harturik. Handik San Martin Unxera itzultzeko bidea joaneko bide berbera da.
