Duela urte sail luzetik hona, Orbaibarrek ibilbide mikologikoen sarea dauka eta, horien artean, Amatriain-Orisoain zeharkaldia dago, San Pelayoko gailurrera igota (958 m). Ibilbidea 2022an seinaleztatu da; zehazki, aipatu ibilbideari tarte luze bat erantsi zaio Orisoain eta Amatriain lotzeko. Horrela, bidexka biribila lortu da.
Orisoaingo hirigune polita zeharkatuz lotuko gatzaizkio ibilbideari eta ekialderantz aterako gara herritik, San Pelayoko bideari jarraikiz. San Pelayo mendi garrantzitsua da eta ia 400 metroko desnibela duen igoera etengabea egin beharko dugu pistetan eta bidexketan barna. Baselizatik igaro ondotik eta inguruz inguru ikuspegi bikainak gozatu eta gero, bidexka meharrean beheiti jaitsiko gara, hegoalderantz; poliki-poliki, zabalduko da, harik eta Amatriain ingurura iritsi arte. Han, herria bisitatzeko parada izanen dugu, 300 metroko desbideratzea hartuta edo, bestela, Orisoainera itzuliko gara ia zailtasunik batere ez duen bide zabal batetik, laboreek sortzen duten mosaiko moldeko paisaia gozatuta.
