Ibilbidearen hasiera haritzen eta arteen arteko bidexka polita da, Pinar del Monte esaten zaion alderdian. 2 kilometroan, ibilbideak gora egiten segitzen du pixka bat, bidexka-tarte arras atseginetan, NA-6020 errepidea paraleloa dugula.
Erreka txiki bat gurutzatu eta gero, ekialderantz joko dugu nekazaritza-bide erosotik errekaren goialderaino igo arte. Handik, ongi zehaztutako bidexka luze-luzea abiatu eta azkar igotzen da Artaxoako Baso aldeko gailur sorta guztiak zeharkatzeko. Zoritxarrez, 2016an, suak basoa ia bere osoan erraustu zuen, baina ikuspegiak oraindik ere ikusgarriak dira zinez.
Kontuan hartu behar da ibilbideko bidexka guztietan mendiko bizikletak ere ibil daitezkeela, eta ugari ibiltzen direla. Funtsezkoa da bidexka erabiltzen duten guztien arteko bizikidetza. Gogoratu mendian jarduera guztiak egin daitezkeela, betiere gainerako jendea errespetatzen badugu.
