Untzueko Haitza (990 m), ziurrenera, Erdialdeko mendirik ospetsuen eta politena da eta eskualdeko toki gehienetik ikusiko dugu. Alaitz mendiko tontorrik txikiena izanik ere, aise antzematen diogu, kareharrizko horma handiak dituelako eta ia piramide-itxura duelako; hortaz, Nafarroako igoerarik ezagunenen eta jendetsuenetakoa bat da.
Untzueko Haitzerako igoera labur samarra baina latza da, aldapa arras maldatsuak baititu tarteka; beraz, gutxieneko sasoi fisiko bat beharko dugu hara igotzeko. Hasteko, Untzueko hirigune polita gurutzatuko dugu. Gero, igoera etengabea da; lehenik, bidean gora eta, gero, arte, ezpel eta ipuruen arteko bidexka meharrean goiti. Bidexka, lehenik, oso era zuzenean igotzen da Haitzerantz, baina goialdean leundu eta, bukaeran, malkorrak eskuin aldetik inguratzen ditu; azkenean, ekialdetik igotzen da tontorrera.
Kaskotik, ikuspegi ikusgarriak gozatuko ditugu inguruz inguru. Gainera, tontorrean gaztelu bat egon zen; agirien arabera, 1300 urteaz geroztik. Egun, dorre baten aztarnak baizik ez dira gelditzen, berrikitan finkatuak.
