Puiu inguruetan berezko hainbat iturburu daude eta urte osoan darie oparo: Siete Fuentes (hortxe gaude), Aranbero Iturria, Valdetina Iturria eta Irruestalia. Proposatzen dugun ibilbide honek iturri guztiak bisitatuko ditu eta, era berean, bi begiratoki panoramiko eta historiaz jantzitako hainbat leku. Haien artean, Zidakos ibaiaren gaineko zubia da nabarmentzekoa, Erdi Arokoa; 70 metrora dago herrirako bidean. Harri landuz eraikia dago, erdi-puntuko arku bat dauka eta beste bat zorrotza; 1975era arte, Puiun sartzeko bide nagusia izan zen.
Errepideko zubia erabiliko dugu Zidakos ibaiaren bestaldera gurutzatzeko, bertan ibilbidea hasten baita. Puiutik ateratzen da ipar-ekialderantz Aranberoko bidean barna. Berehala, Aranberoko iturrira iritsiko gara eta, han bertan, La Campañarako (615 m) igoera hasiko dugu. Mendi horren gainean, parke eoliko txiki bat dago, bai eta begiratoki panoramiko bat ere, Orbaibar eta Erdialdeko zati handi bat zoragarri ikusteko. Ondoren, ibilbidea Valdetina iturriraino jaisten da; hori ibilbideko tokirik urrutiena da eta askaldegi bat dago bertan gelditzeko eta zerbait jateko.
Puiurako itzulera askoz ere lauagoa da Iturriestalia iturriraino iritsi arte. Bertatik, ibilbidea herriko lekurik garaieneraino igotzen da (Santiago baseliza); hori ere begiratoki zoragarria da “Orbaibarko Mendiak” izeneko Kontserbazio Bereziko Eremua ikusteko. Gero, herri guztia goitik behera zeharkatuko dugu Zidakos ibaira eta Siete Fuentes iturrira ailegatzeko, ibilbidearen akabera baita.
