Melida nekazaritza-lautada zabal batean dago kokaturik, Aragoi ibaiak osatutako ibarra mendean duela, ibaia baino 25 metro inguru altuago eraikia baitago ezkerreko ertzean. Proposatzen dugun bidexkak herriaren ekialdean dauden alorrak zeharkatzen ditu Carrizo izeneko alderdiraino; gero, Lalandas errekaren ondotik itzultzen da ibai bazterreko ibar-basoetara iritsi arte. Azkenik, bidexka berri batetik igotzen da Aragoi ibaia ikusteko begiratoki panoramikoraino.
Udal pilotalekutik abiaturik, ibilbideak hasieran ekialdetik inguratzen du hirigunea 600 bat metrotan, harik eta pista eroso eta lau batera iristen den arte. Leku horri Zarrakazteluko bidea esaten zaio. Zenbait etxalde igaro ondoren, ibilbidea, bira eginik, Carrizo izeneko alderdian jaisten da Lalandas errekaraino. Handik pinuen bidetik itzultzen da NA-128 errepidea jo arte; kontu handi-handiz gurutzatuko dugu.
Ibilbidearen azken tartea Melida eta Aragoi ibaiaren arteko baratze eta ibar-basoen eremuan sartzen da. Berriz ere Santakarara doan errepidea kontu handi-handiz gurutzatu eta gero, Melidako Intxaurrondo ikusgarrira iritsiko gara, 2009an Nafarroako Monumentu Natural izendatua. Handik, bidexka bat hartu eta begiratokira igoko gara, ibaia eta ibaiertzeko basoak ederki ikusteko.
