Erriberriko Errege-erreginen Jauregi ikusgarri eta dotorea Nafarroako erakarpenik garrantzitsuenetako bat da turismorako. Errege Jauregia ere esaten zaio. Erriberri, gainera, oso ezaguna da antzinarotik, lurraldeko ardorik onenetakoen sehaska delako eta Nafarroako upategirik garrantzitsuenetako batzuk bertan daudelako. Era berean, Nafarroako ardoaren erakunde nagusiek hantxe dute egoitza, hala nola Ardoaren Kofradiak, Nafarroa Jatorri Deituraren Kontseilu Erregulatzaileak edota Nafarroako Mahastizaintza Estazioak (EVENA). Mahastietako Ibilbidea bidexka laburra da herriaren inguruko mahastietan barna ibiltzeko eta, horrez gain, jauregia eta upategiak bisitatzeko. Ibilaldi erraza da; betiere are interesgarriagoa da udako hilabeteetan eta udazkenean, mahastiak kolore ederrez janzten direnean.
Errege Jauregiko atetik, ibilbidea Castejon eta Altsasu arteko trenbiderantz doa eta lurpeko pasabide batetik zeharkatuko dugu. Behin bestaldean, ibilbideak eskuinerantz biratu eta aitzina eginen du San Martin Unxeko errepide azpitik igaro arte. Ondotik, kiribila egiten du La Huerta izeneko eremuko mahastietan zehar, bai eta Zidakosen ibaiertzeko tarte batean ere. Itzulera trenbidearen ondotik eginen dugu aipatu errepideraino eta, errepidetik, berriz, hasierako bide beretik itzuliko gara.
